Antxon Sagardui ekoizle bilbotarrak oraingo honetan Suaiaren Adoktrinatuak kantua aukeratu du erremixa egiteko.

Kantua deskargai duzue Crudo Bilbaoren Soundcloud orrian.

“Era askean dantzatzen dugu, sound systemaren erritmora espazioak askatzen , legez kanpo autogestionatuz”

Suaia sortzaileak “Legez Kanpo Dantzan” deituriko EP berria aurkezten du, bere lan berriaren barruan aurkitu dezakegun abesti baten bideokliparen laguntzaz.

Suaiak, lan berri honetan, lau abestiz eta lau bertsioz osatutako EP bat aurkezten du, sound system-era zuzendutako diskoa, reggae-dub edota stepperretik ragga-jungle-era doana.

Sortzaileak, bere bakarkako lehenengo erreferentziatik “Mundua Salgai”, 2017.urtean “Piztu! Mixtape” lana eta single ezberdinak kaleratu ditu. Gaurkoan, “Legez Kanpo Dantzan” lan berria aurkezten du. Sortzailearen aburuz, “askatasun murrizketak eta errepresioaren garaia bizi dugu, zentzura eta jazarpen ideologikoarena, hainbat pertsonarentzako bat ere berririk ez dena. Normaltasunez jokatzen dugu. Horregatik, sound systemak transmititzen dituen baloreak omendu nahi izan ditut, hau da, askatasuna eta autogestioa, eta era berean, autogestioaren bitartez espazioak eraldatu eta askatzen dituzten pertsonak ere omendu”.

Lan osoa Suaia “askapensound” ezizenarekin produzitu egin du, “Ez zait inporta” abestia izan ezik, Euridiarekin batera ekoiztu duena. Disko honen grabaketa Laga estudioan burutu da eta nahasketa eta masterizazioaz Ibon Larruzea arduratu da Euridia estudioan.

Lan berri honetan, “Piztu! Mixtape” lanean agertzen diren hiru abesti aurkitzen ditugu, baina oraingoan bertsio peto moduan aurkezten dira, bakoitza erremixa edo dub bertsioarekin batera. Bestetik, “Ez zait inporta” abestia aurkitzen da, “mass media eta Ibexeko 35 lapurrak” kritikatzen duen abestia hain zuzen ere, Eduardo Galeanoren hitzek zabaltzen dutena.

Bere lan berriarekin batera, Suaiak “Hemen eta Orain” abestiaren bideoklipa aurkezten du, Tiro Pun Ekoizpenak sortutako bideoa eta Jessica Brunet boxeolariaren elkarlana duena. Ragga-jungle estiloko kanta iluna eta subertsiboa dantzatokira zuzenduta.

Sortzaile biak hiru abestiz osotutako proiektu txiki eta txukun bat sortzeko alkartu dira. Lan honetan, Suaiaren eta Markes Iraizozen mezu ozenak entzun daitekezala dinoe Taupaka diskoetxekoek, horretarako, doinu lasaiak eta berba garbiak aukeratu ditue.

Arnasa berbea aukeratu dabe proiektu barri honi izena emoteko, arnasea hartzeko doinuak eta letrak batuz eta arnasearen bidez hausnarketea egiteko. Diskoan hainbat idea zabaldu nahi izan ditue sortzaile biek: Zergatik eta Deia abestien bidez, esaterako, mundu gizatiarrago baten aldeko ideak, alkarreganako maitasuna eta laguntzinoa sustatzeko mezuakaz eta kapitalismoa, lehiakortasuna eta indibidualismoa alde batera lagaten ditue. Geurean tinko kantuan, aldiz, gure bizitzan izaten doguzan oztopoen aurrean tinko ibilteko eta gureaz harro egoteko deia zabaldu nahi izan dabe.

Bikoak ez dau lan hau formatu fisikoan argitaratuko; entzuleek diskoa Taupakaren youtube kanalean eta webgunean daukie entzungai eta hortik deskargatu leikie.

Break jantzeak lehenik eta rapak geroago, Gasteizko lagun bi honeen bideak batu zituen. Kodigo Norte taldearen bidez egin ziran ezagun eta hainbat dira argitaratu dituen diskoak. Oparoak izan dira be euren bakarkako ibilibideak be.

Markes Iraizozek hiru lan argitaratu ditu: Un paseo por mi mente, Independencia eta Musicamina. Lan honeek hip hop-aren munduan ezinbesteko klasiko bihurtu dabe Iraizoz. Gaur egun, bere laugarren estudioko lana atontzen dabil eta 2018an aurkeztuko dau.

Gorka Suaiak, bere aldetik, hainbat proiektutan parte hartu dau. 2012an bakarko bideari ekin eutson eta Askapen Sound Sistemaren Mundua Salgai, Suaia eta Lahaineren Herrima EPa Endika Lahainegaz, eta Piztu! Mixtape Kimo Soundz DJagaz. Esne Beltzaren Gora! Tourrean be parte hartu eban. 2018an, Ama Rebel reggae bandeagaz disko barria argitaratuko dau.

Ama Rebel Euskal Herriko reggae banda berria da. 2016an sortua, eta Bizkaiko oihanean kokatuta, euskal eszenan sarri aritzen diren zazpi reggaelariz osatuta dago:
Mikroan: Gorka Suaia
Baxuan: Joseba Urruela “Urru”
Gitarran: Teje
Teklatuetan: Gorkinha
Teklatu eta sinteetan: Txals
Efektu eta sanplerretan: Markel Andia
Baterian: Ion Arenas
Hainbat reggae talde ezberdinetan hartu dute parte: Kodigo Norte, Esne Beltza, Potato, Lone Ark, Early Reflections, Gobeo Bay, Thunder Clap Sound System…
Oraingo honetan Ama Rebel tadea sortzeko batu egin dira.
Ama Rebel ez da estilo bakar batera mugatzen, ezta entretenimendura ere; reggae dancehall, roots, rub-a-dub…mezuaren mesedetan, reggaeren sustrai aldarrikatzaileak bizirik mantenduz, ikur errebelde eta euskalduna gogor astinduz.
Horretarako, eta Gorka Suaiaren Piztu! Mixtapeko errepertoriotik abiatuta, zuzeneko indartsu, dantzagarri eta anitza eskainiko digu, laster kaleratuko duen EP diskako kanta batzuekin osatuta ere.

Ama Rebel, soul rebel!

Gorka Suaia eta Juantxo Arakamak, Glaukomako abeslariak, Erdi Bana abestiaren bideoklipa egin dute. Itota (Taupaka Elkartea, 2015) abestiaren bideoklipean egin zuten lan elkarrekin lehen aldiz eta arrakastatsua izan zen, orain dantzalekuetara zuzendutako abesti batekin bueltatu dira. Dancehall erritmoa du oinarritzat eta Gorkak berak egin du Askapen Sound izenpean.

Single hau Gorka Suaia eta Kimo Soundzek elkarrekin egindako “Piztu! Mixtape” lanekoa da eta honen riddim instrumentalarekin batera argitaratu da

Gorka Suaia eta Kimo Soundzen “Piztu! Mixtape” (Taupaka Elkartea, 2016) laneko abesti bat da singlea eta bertsolaritza gogorarazten duen abestia da, abeslariak txandakatu egiten baitira lehenengoak ezartzen duen errima eta doinua mantenduz.

Etchecoy izan da bideoa zuzendu eta grabatu duena, nahasketa eta masterizazioa aldiz, Ibon Larruzeak egin ditu Euridian.

Kultura askearen filosofia

Abestia bere riddim instrumentalarekin batera dator, Taupaka Elkarteak zabaldu nahi duen kultura askearen filosofia jarraituz, Gorka Suaia parte den elkartea. Generoaren edozein jarraitzailek erabili dezake, askatasun osoz, baita publikatu ere, baina Creative Commons lizentziapean.

Dub bertsioarekin batera argitaratu da bideoklipeko protagonista den abestia eta zazpi pulgadatako reggae biniloen antzera dator, baina bertsio digitalean. Historia luze baten ondorioa dugu Adoktrinatuak abestia. Izan ere, 2015ean argitaratu zen hip hop-dubstep bertsioan Suaia eta Lahaine bikotearen Herrima albumean, eta 2016an Kimo Soundz dj-arekin batera izan zen nahastua Piztu! Mixtape-n. Orain single formatuan dator Gorkak eginda, produktore lanak egiteko erabiltzen duen Askapen Sound ezizenpean.

Frekuentzia pisutsuzko erritmo ilun eta hipnotikoak dira, sound systemak dardarka jarriko dituztenak. “Hip hop eta reggae ingurugiroetan, ohikoa da abesti zaharrak erabiltzea erritmo berrietara moldatzeko, askotan zuzenekoen magiaren ondorioa izaten da, dj-en festetan eta freestyle-an gertatzen den moduan”, azaltzen du Gorkak.

Dub bertsioarekin batera dator singlea, Gorkak berak Euridia Estudio-n eginda. Artwork-a Markel Andiaren eskutik dator.

“Babylon sistema”-ra zuzen tirokatzen duen mezua

Adoktrinatuak kantuak mezu zuzen bat transmititzen du, “kartoizko oheak, plastikozko loreak” edota “men egiteko programatuak” bezalako esaldiek adierazten dute Gorkak bere ingurua nola aztertzen duen. “Ideologia bakarraren agintean bizi gara. Hezkuntza sistemak esklabu kontsumistak sortzen ditu sistemaren makina ez gelditzeko”, azaltzen du Gorka Suaiak.

Ibon Larruzea soinu ingeniaria izan da nahasketa eta masterizazioaz arduratu dena Euridia estudioan, bideoklipa, ordea, Bilboko erdigunean eta Errekaleorren izan da grabatua besteak beste, TiroPun Ekoizpenak-en lanari esker.

Taupakaren webgunean eta Gorka Suaiaren Soundcloud orrian deskargai.

Apirilak 14 eta 15  Igorren ospatuko den Gazte Akelarrea jaialdiarekin hitzordu berezia daukagu, Ernaik eta Aitzinak antolatutakoa. Egitarau oparoa prestatu dute, honen baitan  apirilak 15 Aneguria, Crudo Bilbao, Mad Muasel eta Gorka Suaia arituko dira Euskal Dub Etxearen sound systemekin batera.

Ez galdu aukera!

Info gehiago: gazteakelarrea.info

Gorka Suaiak “Piztu Mixtape” azken lanean Iñigo Cabacasi eskaini zion reggae-dub omenaldiaren bideoa aurkeztu du, Tiro Pun Ekoizpenak-ekin elkarlanean. Gorka Suaiak 2016ko azaroan kaleratutako 22 abestiz osatutako “Piztu! Mixtape” (Taupaka Elkartea) diskoan, Iñigo Cabacasi omenaldia egiteko kantua aurkezten du: “Iñigo Cabacas gogoan dub” eta gaurkoan, abesti horren bideoklipa aurkezten digu sortzaileak.