Markes Iraizoz eta Suaiak ‘Arnasa’ maxia kaleratu dute

Sortzaile biak hiru abestiz osotutako proiektu txiki eta txukun bat sortzeko alkartu dira. Lan honetan, Suaiaren eta Markes Iraizozen mezu ozenak entzun daitekezala dinoe Taupaka diskoetxekoek, horretarako, doinu lasaiak eta berba garbiak aukeratu ditue.

Arnasa berbea aukeratu dabe proiektu barri honi izena emoteko, arnasea hartzeko doinuak eta letrak batuz eta arnasearen bidez hausnarketea egiteko. Diskoan hainbat idea zabaldu nahi izan ditue sortzaile biek: Zergatik eta Deia abestien bidez, esaterako, mundu gizatiarrago baten aldeko ideak, alkarreganako maitasuna eta laguntzinoa sustatzeko mezuakaz eta kapitalismoa, lehiakortasuna eta indibidualismoa alde batera lagaten ditue. Geurean tinko kantuan, aldiz, gure bizitzan izaten doguzan oztopoen aurrean tinko ibilteko eta gureaz harro egoteko deia zabaldu nahi izan dabe.

Bikoak ez dau lan hau formatu fisikoan argitaratuko; entzuleek diskoa Taupakaren youtube kanalean eta webgunean daukie entzungai eta hortik deskargatu leikie.

Break jantzeak lehenik eta rapak geroago, Gasteizko lagun bi honeen bideak batu zituen. Kodigo Norte taldearen bidez egin ziran ezagun eta hainbat dira argitaratu dituen diskoak. Oparoak izan dira be euren bakarkako ibilibideak be.

Markes Iraizozek hiru lan argitaratu ditu: Un paseo por mi mente, Independencia eta Musicamina. Lan honeek hip hop-aren munduan ezinbesteko klasiko bihurtu dabe Iraizoz. Gaur egun, bere laugarren estudioko lana atontzen dabil eta 2018an aurkeztuko dau.

Gorka Suaiak, bere aldetik, hainbat proiektutan parte hartu dau. 2012an bakarko bideari ekin eutson eta Askapen Sound Sistemaren Mundua Salgai, Suaia eta Lahaineren Herrima EPa Endika Lahainegaz, eta Piztu! Mixtape Kimo Soundz DJagaz. Esne Beltzaren Gora! Tourrean be parte hartu eban. 2018an, Ama Rebel reggae bandeagaz disko barria argitaratuko dau.

Advertisements

Ama Rebel: Gorka Suaiaren proiektu berria martxan da!

Ama Rebel Euskal Herriko reggae banda berria da. 2016an sortua, eta Bizkaiko oihanean kokatuta, euskal eszenan sarri aritzen diren zazpi reggaelariz osatuta dago:
Mikroan: Gorka Suaia
Baxuan: Joseba Urruela “Urru”
Gitarran: Teje
Teklatuetan: Gorkinha
Teklatu eta sinteetan: Txals
Efektu eta sanplerretan: Markel Andia
Baterian: Ion Arenas
Hainbat reggae talde ezberdinetan hartu dute parte: Kodigo Norte, Esne Beltza, Potato, Lone Ark, Early Reflections, Gobeo Bay, Thunder Clap Sound System…
Oraingo honetan Ama Rebel tadea sortzeko batu egin dira.
Ama Rebel ez da estilo bakar batera mugatzen, ezta entretenimendura ere; reggae dancehall, roots, rub-a-dub…mezuaren mesedetan, reggaeren sustrai aldarrikatzaileak bizirik mantenduz, ikur errebelde eta euskalduna gogor astinduz.
Horretarako, eta Gorka Suaiaren Piztu! Mixtapeko errepertoriotik abiatuta, zuzeneko indartsu, dantzagarri eta anitza eskainiko digu, laster kaleratuko duen EP diskako kanta batzuekin osatuta ere.

Ama Rebel, soul rebel!

GORKA SUAIAK ERDI BANA BIDEOKLIPA AURKEZTU DU JUANTXO ARAKAMAREKIN BATERA

 

Gorka Suaia eta Juantxo Arakamak, Glaukomako abeslariak, Erdi Bana abestiaren bideoklipa egin dute. Itota (Taupaka Elkartea, 2015) abestiaren bideoklipean egin zuten lan elkarrekin lehen aldiz eta arrakastatsua izan zen, orain dantzalekuetara zuzendutako abesti batekin bueltatu dira. Dancehall erritmoa du oinarritzat eta Gorkak berak egin du Askapen Sound izenpean.

Single hau Gorka Suaia eta Kimo Soundzek elkarrekin egindako “Piztu! Mixtape” lanekoa da eta honen riddim instrumentalarekin batera argitaratu da

Gorka Suaia eta Kimo Soundzen “Piztu! Mixtape” (Taupaka Elkartea, 2016) laneko abesti bat da singlea erdibanaeta bertsolaritza gogorarazten duen abestia da, abeslariak txandakatu egiten baitira lehenengoak ezartzen duen errima eta doinua mantenduz.

Etchecoy izan da bideoa zuzendu eta grabatu duena, nahasketa eta masterizazioa aldiz, Ibon Larruzeak egin ditu Euridian.

Kultura askearen filosofia

Abestia bere riddim instrumentalarekin batera dator, Taupaka Elkarteak zabaldu nahi duen kultura askearen filosofia jarraituz, Gorka Suaia parte den elkartea. Generoaren edozein jarraitzailek erabili dezake, askatasun osoz, baita publikatu ere, baina Creative Commons lizentziapean.

GORKA SUAIAK “ADOKTRINATUAK” SINGLE BERRIAREN BIDEOKLIPA KALERATU DU

Dub bertsioarekin batera argitaratu da bideoklipeko protagonista den abestia eta zazpi pulgadatako reggae biniloen antzera dator, baina bertsio digitalean. Historia luze baten ondorioa dugu Adoktrinatuak abestia. Izan ere, 2015ean argitaratu zen hip hop-dubstep bertsioan Suaia eta Lahaine bikotearen Herrima albumean, eta 2016an Kimo Soundz dj-arekin batera izan zen nahastua Piztu! Mixtape-n. Orain single formatuan dator Gorkak eginda, produktore lanak egiteko erabiltzen duen Askapen Sound ezizenpean.

Frekuentzia pisutsuzko erritmo ilun eta hipnotikoak dira, sound systemak dardarka jarriko dituztenak. “Hip hop eta reggae ingurugiroetan, ohikoa da abesti zaharrak erabiltzea erritmo berrietara moldatzeko, askotan zuzenekoen magiaren ondorioa izaten da, dj-en festetan eta freestyle-an gertatzen den moduan”, azaltzen du Gorkak.

Dub bertsioarekin batera dator singlea, Gorkak berak Euridia Estudio-n eginda. Artwork-a Markel Andiaren eskutik dator.

“Babylon sistema”-ra zuzen tirokatzen duen mezua

Adoktrinatuak kantuak mezu zuzen bat transmititzen du, “kartoizko oheak, plastikozko loreak” edota “men egiteko programatuak” bezalako esaldiek adierazten dute Gorkak bere ingurua nola aztertzen duen. “Ideologia bakarraren agintean bizi gara. Hezkuntza sistemak esklabu kontsumistak sortzen ditu sistemaren makina ez gelditzeko”, azaltzen du Gorka Suaiak.

Ibon Larruzea soinu ingeniaria izan da nahasketa eta masterizazioaz arduratu dena Euridia estudioan, bideoklipa, ordea, Bilboko erdigunean eta Errekaleorren izan da grabatua besteak beste, TiroPun Ekoizpenak-en lanari esker.

Taupakaren webgunean eta Gorka Suaiaren Soundcloud orrian deskargai.

GORKA SUAIAK IÑIGO CABACASEN ERAILKETAREN URTEURRENERAKO EGINDAKO DUB OMENALDIA IRUDIETAN: “IÑIGO CABACAS GOGOAN DUB”

C8zNqy5XYAUYRpq

Gorka Suaiak “Piztu Mixtape” azken lanean Iñigo Cabacasi eskaini zion reggae-dub omenaldiaren bideoa aurkeztu du, Tiro Pun Ekoizpenak-ekin elkarlanean. Gorka Suaiak 2016ko azaroan kaleratutako 22 abestiz osatutako “Piztu! Mixtape” (Taupaka Elkartea) diskoan, Iñigo Cabacasi omenaldia egiteko kantua aurkezten du: “Iñigo Cabacas gogoan dub” eta gaurkoan, abesti horren bideoklipa aurkezten digu sortzaileak.

Gorka Suaiak, proiektu ezberdinetan parte hartu eta gero (Kodigo Norte, Esne Beltza, Suaia eta Lahaine,…), bere bakarkako sorkuntzari bidea ematen dio, 2016ko azaroan bere abesti guztien erremixak disko bakar batean barnebilduz, Kimo Soundz-ek nahastutako 22 kantuz osatutako mixtape batean.

“Iñigo Cabacas gogoan dub”: 5.urteurrenean omenaldia irudietan.

Data sinboliko eta berezi honekin bat egiteko asmoz, Gorka Suaiak Piztu! Mixtape azken lanean Iñigori eskaini zion reggae-dub omenaldiaren bideoa argitaratu du, Tiro Pun Ekoizpenak-ekin elkarlanean.

Igandean Iñigo Cabacasen erailketaren bostgarren urteurrena beteko da, bost urtez justizia eske, bost urte luze inpunitate eta ahanzturaren aurka borrokan.

AKA Askapen Sound